අධි පෝෂණය පිරි සෝයා කෑම

ඔක්තෝබර් 13, 2021

 

සෝයා කියන්නේ පෝෂණය අධික ආහාරයක්. ඒත් හුඟාක් දෙනෙක් සෝයාවලින් කෑම සකසාගන්න දන්නේ නැහැ. ඒ අයට අත්වැලක් වන්නටයි මේ දිග හැරුම…

 

ඡායාරූප හා උපදෙස්

සූපවේදිනී -

තිලානි විතානගේ

 

 

සෝයා මීට් ගෙදර හදමු

ගොඩක් දෙනෙක් කඩේ තියෙන සෝයා මීට ගෙනත් හදලා කනවා. තවත් අය කඩේ තියෙන සෝයා මීට් කන්න කැමැති නෑ. ඒත් අපි ඔක්කොටම පුළුවන් සෝයා මීට ගෙදර දී ම හදාගන්න. මෙන්න තියෙනවා සෝයා ඇටවලින් සෝයා මිට් හදන ක්‍රමය. එහෙමනම් ඔබත් ගෙදර දී ම සෝයා මීට් මෙලෙස සකසා ගන්න.

අවශ්‍ය වන්නේ

සෝයා ඇට කෝප්පයක්

මිරිස් කුඩු හා තුනපහ කුඩු ඔබේ රස අනුව

ලුණු කුඩු ස්වල්පයක්

සූදුරු ස්වල්පයක්

පෙරුම්කායම් ස්වල්පයක්

(අත්‍යාවශ්‍යම නෑ)

සූදුරු ස්වල්පයක්

 

හදන්නේ මෙහෙමයි

 

මුලින්ම සෝයා ඇටවලට වතුර කෝප්ප 2ක් දමා රැයක් පෙඟෙන්න තියන්න.

පසු දින උදේ සෝයා ඇට ටික පෙරා හරියටම වතුර කෝප්ප කාලක් දමා එක් වරක් බ්ලෙන්ඩ් කර නවත්තන්න.

දැන් එයට සියලුම දේවල් එකතු කර නැවතත් ක්‍රීම් එකක් වගේ වෙනකම් හොඳින් බ්ලෙන්ඩ් කරන්න.

දැන් මේ මිශ්‍රණයෙන් කුඩා ප්‍රමාණ බැගින් ගෙන පින්තූරයේ පෙනෙන ලෙස ඉටි කොළයක දමා සෝයාමීට් කැබලි ඝන වෙනකම් තද අව්වේ හොඳින් වේළා ගන්න. නැත්නම් තෙල් තවරා ගත් තැටියක දමා අවන් එකේ සෙල්සියස්ංශක 180ක උෂ්ණත්වයෙන් විනාඩි 15ක් පමණ බේක් කර ගන්න.

හොඳින් වියළාගත් පසු සුළං නොවදින වියළි භාජනයකට දමා වසා තබා අපි සාමාන්‍ය සෝයාමීට් ව්‍යාංජනය උයන විදිහට හෝ ගැඹුරු තෙලේ බැදලා ඩෙවල් එකක් සාදා ගන්න පුළුවන්.

රාබු කොළ මිශ්‍ර සෝයා බීන් කර්ඩ්/ටෝෆු

 

සෝයා කිරි මුදවලා හදන බීන් කර්ඩ් නැත්නම් ටෝෆු (Tofu) ලංකාවේ අපිට ඒ තරම් පුරුදු කෑමක් නොවුණත් ජපානය, කොරියාව, තායිලන්තය වගේ රටවල බොහෝම ජනප්‍රිය කෑමක්.

ඒත් අපේ බොහොමයක් දෙනා රසවත් ලෙස ටෝෆු සකසාගන්න දන්නේ නෑ. මෙන්න බලන්න, ටෝෆු රසවත් ලෙස හදන විදිහ.

අවශ්‍ය වන්නේ

ටොෆු පැකට් එකක් (කුට්ටියක් ලෙස පැකට් කර ඇති මේවා සුපිරි වෙළෙඳසල්වලින් මිළදී ගත හැකියි.)

තළාගත් සුදු ලූනු, තරමක ලොකු කෑලි කපාගත් බීලූනු, අමු මිරිස් හා තක්කාලි

කුඩාවට කපා ගත් වියළි මිරිස් කරල් 2ක්

කෑලි මිරිස් හා අබ ස්වල්පයක්

සෝයා සෝස් මේස හැඳි 2ක්

දෙහි ඉස්ම ස්වල්පයක්

කෑලි කපාගත් රාබු කොළ කිහිපයක්

තක්කාලි සෝස් මේස හැඳි 2ක්

හදන්නේ මෙහෙමයි

මුලින්ම ටෝෆු කෑල්ල කොටු ආකාරයට කැබලි කපා ගන්න.

දැන් ඒ ටික පරිස්සමෙන් කැඩෙන්නේ නැතිවෙන්න ගැඹුරු තෙලේ රන්වන් පැහැ වනතුරු බැදගෙන හොඳින් තෙල් බේරා ගන්න.භාජනයක් ළිප තබා එයට තෙල් ටිකක් දමා රත් වෙනකොට අබ දමා පුපුරුවා ගන්න. එයටම සුදු ලූනු, වියළි මිරිස් කෑලි ටිකත් දාන්න.බැද ගත් ටෝෆු ටික, දෙහි ඉස්ම හා රාබු කොළ හැර ඉතිරි සියලුම දේවල් ටික දමා ටික වෙලාවක් හොඳින් තෙම්පරාදු කර ගන්න.

දැන් එයට රාබු කොළ හා ටෝෆු ටික දමා හැන්දකින් හෙමින් මිශ්‍ර කරන්න. අවසානයට දෙහි එකතු කරන්න.(සෝයා සෝස්වල ලුණු අඩංගු නිසා ලුණු එකතු කරන්න අවශ්‍ය වෙන්නේ නෑ)

 

සෝයා කිරි

සෝයා කිරි පෝෂණය පිරුණු රසවත් පානයකි. ඒත් බොහොමයක් දෙනා සෝයා කිරි හදන්න දන්නෙ නෑ. ඒ අයටයි මේ අවස්ථාව.

 

අවශ්‍ය වන්නේ

සෝයා ඇට කෝප්පයක්

වතුර කෝප්ප 5ක්

පිරිසුදු දුහුල් රෙදි කඩක්

 

හදන්නේ මෙහෙමයි

සෝයා ඇටවලට වතුර කෝප්ප 2ක් දමා රැයක් පෙඟෙන්න තියන්න. පහුවදාට හොඳින් වතුර බේරා වතුර කෝප්ප 2ක් දමා ළිපේ තබා විනාඩි 5ක් පමණ උණු කරන්න.

නිවුණාට පසු ආපහු ඒ වතුර ටික පෙරා තවත් වතුර කෝප්ප 5ක් දමා හොඳින් බ්ලෙන්ඩ් කරන්න.

දැන් සිහින් රෙදි කඩකට දමා මිරිකා සෝයා කිරි පෙරා රොඩ්ඩ (ඔකාරා) ඉවත් කරන්න.

කිරි මිශ්‍රණය ළිපේ තියන්න පුළුවන් (Nonstick එකක් නම් හොඳයි) භාජනයකට දමා හරියටම පැය භාගයක් හැඳි ගාමින් අඩු ගින්දරේ උතුරුවා ගන්න.

ලුණු ස්වල්පයක්, වැනිලා ස්වල්පයක් හා අවශ්‍ය නම් සීනි එකතු කර බීමට ගන්න පුළුවන්. ශීතකරණයේ තබා කූල් කර බොන්නත් පුළුවන්. රස ගුණ පිරි පානයක්.

 

සෝයා අයිස්ක්‍රීම්

අපි ගෙදර දී ම සෝයා අයිස්ක්‍රීම් සකසා රස විඳිමු.

 

අවශ්‍ය වන්නේ

 

සෝයා කිරි මිලිලීටර් 100ක්

හොඳින් කූල් කරගත් විපිං ක්‍රීම් කෝප්පයක් (ග්‍රෑම් 225ක්)

කිරිපිටි ග්‍රෑම් 50ක්

අයිසිං සීනී ග්‍රෑම් 150ක්

චොකලට් රසට අවශ්‍ය නම් කොකෝ පවුඩර් ග්‍රෑම් 75ක් හෝ වැනිලා රසට අවශ්‍ය නම් වැනිලා තේ හැන්දක්

 

හදන්නේ මෙහෙමයි

 

නොන්ස්ටික් භාජනයක් ළිපේ තියා සෝයා කිරි මඳ ගින්නේ රත් කරන්න.

දැන් එයට අයිසිං සීනී, කිරිපිටි හා කොකෝ පවුඩර් එකතු කර මිශ්‍රණය උකු වෙනකම් හැඳි ගාන්න. ඝන වූ පසු මිශ්‍රණය නිවෙන්න තියන්න.

දැන් හොඳින් කූල් කරපු විපිං ක්‍රීම් ඉලෙක්ට්‍රික් බීටරයකින් බීට් කරන්න. මිශ්‍රණය Foam එකක් වගේ වූ පසු නවත්තන්න. කලින් නිවාගත් මිශ්‍රණය හා විපිං ක්‍රීම් එකට දමා හැන්දකින් කලවම් කරන්න. අවශ්‍ය නම් කජු එකතු කර ගන්න පුළුවන්. මෙම සෝයා අයිස්ක්‍රීම් මිශ්‍රණය පැය 5ක් පමණ අධිකරණයේ තබා රස විඳින්න.

 

සෝයා බීන් කර්ඩ්/ටෝෆු තෙම්පරාදුවක්

 

ටෝෆු රසවත් ලෙස සකසන තවත් ක්‍රමයකි මේ.

 

අවශ්‍ය වන්නේ

 

ටෝෆු පැකට් එකක්

තළාගත් ගත් සුදු ලූනු, කපාගත් බීලූනු, අමු මිරිස් හා හොඳින් ඉදුණු තක්කාලි

කෑලි මිරිස් හා අබ ස්වල්පයක්

සෝයා සෝස් මේස හැන්දක්

තක්කාලි සෝස් මේස හැන්දක්

සුදු තල ඇට ස්වල්පයක්

 

හදන්නේ මෙහෙමයි

 

මුලින්ම ටෝෆු කෑල්ල කොටු ආකාරයට කැබලි කපා ගන්න.

දැන් නොන්ස්ටික් පෑන් එකකට තෙල් ටිකක් දමා රත් කර ටෝෆු කෑලි ටික පරිස්සමෙන් දමා කැඩෙන්නේ නැතිවෙන්න පොඩ්ඩක් දුඹුරු පැහැ වෙනකම් දෙපැත්ත හරවා බැද ගන්න. ඊට පස්සේ ඒ ටික තෙල් බේරෙන්න තියන්න.

දැන් භාජනයක් ළිප තබා එයට තෙල් ටිකක් දමා රත් වෙනකොට අබ පුපුරුවා ගන්න. එයටම සුදු ලූණු හා තක්කාලි දමා තෙම්පරාදු කරන්න. ඒ ගමන් තක්කාලි ටික හැන්දකින් පොඩි කරන්න.

එයටම බැද ගත් ටෝෆු ටික හැර ඉතිරි සියලුම දේවල් ටික දමා තවත් ටික වෙලාවක් තෙම්පරාදු කර ගන්න.

ඊට පස්සේ ටෝෆු ටික දමා හැන්දකින් හෙමින් මිශ්‍ර කරන්න. අවසානයට තල ඇට ටික එකතු කරන්න.