පාඨක නිර්මාණ

Week of මාර්තු 13, 2024

'නොපිපි කෝපි මල'
- පවිත්‍රා ~

 

ඔයා වැඩිපුරම කැමැති මොන මලට ද?

'කෝපි මලට'

ඔව් මගේ උත්තරේ ඒක.. ඒ තරමට මම කෝපි මල්වලට, මලෙන් හමන සුවඳට ඇබ්බැහි වෙලා..

මට මතක කාලේ ඉඳලම අපේ ගෙදර පිටිපස්සේ කෝපි ගහක් තිබුණා. ඒ ගහේ මල් පිපෙන කාලෙට කොළයක් හොයාගන්න බැරි තරමටම කෝපි මල් පිරිලා. මල් පිපෙන ඒ කාලෙට මී මැස්සොන්ට නම් රජ මඟුල්.

අවාසනාවකට මම හිටපු කාමරේට කෝපි මල් සුවඳ ආවේ නෑ. ඒ වුණාට වාසනාවකටදෝ මන්දා අක්කගේ කාමරේට කෝපි මල් සුවඳ හොඳටෝම දැනෙනවා.
ඒ වගේම කාමරේ ජනේලයෙන් එළිය බැලුවම පේන්නෙත් සුදු පාටින් මල් පිරිලා තියෙන කෝපි ගහ.

මතකයි දවසක්
කෝපි මල් සුවඳ වෙනුවෙන්....
මී මැස්සොන්ගේ ගුමු ගුමුව වෙනුවෙන්.....
මම අක්කගේ කාමරේ ඉල්ලලා රණ්ඩු කරා කියලා.

සමාවෙන්න අක්කේ රණ්ඩු කරාට..
ඒ වුණාට මම කැමැති නෑ
කෝපි මල් සුවඳ කාත් එක්කවත් බෙදාගන්න..
ඒ තරමට ඒක ඇබ්බැහියක්..

ඉතින් දැන් ඒ පුංචි කාමරේ වගේම
කෝපි ගහේ කෝපි මල්වලත්
අයිතිය තියෙන්නේ මට..

 

නොකරන් සාප
ගාමිණී මද්දුමගේ ~

 
 (තෙවස් පුතුගෙ ගෙල වැළලා ගත් මව  රෝහලට ගෙන ආවේය.)
 
 අටවක චන්ද්‍ර මණ්ඩලයේ
 අහස යට
 වෙහෙසට දෑස පියවුණු සුළු
 මොහොතකට
 රැහැනක් ගෙල ඔතා මියගිය
 කෙනෙකුහට
 ජීවය දෙන්න කැඳවිය
 බැරි වුණිය මට
 
 කිඳුරිය හැඬුවෙ කිඳුරා පෙර
 මැරුණු කොට
 කිඳුරා වැලපේය
 මා අබිමුවෙහි සිට
 තුන් වස් පුතෙකුහට සෙනෙහස
 අහිමි කොට
 යහනට එළූ තිරපට ඇත
 ගෙලෙහි වට
 
 විස්කම් දේව පුතු හෙම මා
 නොවන කොට
 ගිය ඇය මෙලොව යළි කැඳවනු
 නොහැකි විට
 මිය ගොස් ඇතැයි මළපොතෙ වත
 ලියන කොට
 මගෙ පුතු නොවුණ මුත් ඒ පුතු
 පෙනුණි මට
 
 බහ තෝරන වියේ පියවර
 තබන කොට
 වැටිලා බිමට ඇඬුවොත් නුඹ
 රිදෙන කොට
 නුඹෙ මවු නුඹට දෙනු බැරිවුණ
 කරුණු පිට
 නොකරන් සාප පුතුනේ
 දොස්තරෙකුහට
 

 දිසා වෛද්‍ය නිලධාරි
 කන්දකැටිය දිසා රෝහල
 වියලුව

මනමේට දැන් පුරුදුය
මදාරා පසඳනී ගුණවර්ධන ~


 
 තිර පිටපතම කියවා,
 ජවනිකා අනුපිළිවෙළින්
 දැනගෙන
 මනමේ බලන අපිට
 ඇත්ත⁣ට, පිස්සුද...
 
 එහෙම නැත්තම්,
 
 හොඳින් පෙර පුහුණුව
 එකම වේදිකාවේ
 පුරුද්දට කඩුපහර කන
 මනමේට පිස්සුද?
 
 එකම කඩුවට
 පපුව දෙන එක,
 එකම කඩු පහරට
 ඉපදි ඉපදී මැරෙන එක
 මනමේට දැන් පුරුදුය..
 එය සංවේගජනකය..
 මඳකට රඟහලම
 අඳුරු වන්නේ,
 කඩු තුඩෙහි
 ඇමිණී සිටිනත'ර,
 මනමේට කඳුළක් පිසදා
 ගැනුම පිණිසය..
 

ගුරුතුමියගෙන් පසුවදනක්
චාන්දනී දේවිකා පුංචිහේවා ~


 
 සුවඳවත් විය
 අර්ථවත් විය
 ජීවිතයම
 සිටින තුරා
 නුඹ
 මා ළඟම ....
 
 ප්‍රීතිමත් විය
 සුවදායි විය
 හදවතම
 පියමං කරනා තුරා
 නුඹ මට ද ඉදිරියෙන් ....
 

ගොවි සැන්දෑව
ලක්ෂ්මන් පතිරණ ~

 

සුදු පාට සඳ මලයි
රත් පැහැති හිරු මලයි
සැන්දෑවේ සමයමයි
නැඟ එන්නෙ කළුවරයි

වෙල් යාය නිසසලයි
රැහැයි නාදය නගයි
ගොවි පැලට තනිකමයි
කවිය පාළුව මකයි

දිලෙන කූඩලු මලයි
යල මහද හොඳ වෙතැයි
සීවරන් හිමි යදියි
සිත් සතුට ඉපිල යයි
 

අහිමි වූ හීන
- සංසාරිනී - ~


 කෝපි පාට අහසක්
 සැමදා හීන දකින මා
 
 දිනිඳාගේ බැස යාම
 සිදුවන තෙක් බලා සිටින මා
 
 සමුදුර ඔහුගේ දෑත්වලින්
 මාගේ පාද සිපගන්න
 බලා සිටින මා
 
 බර මල් අත්තකින්
 පොළොවේ දිගා වී ඇති
 මල් ඇතිරිල්ල දෙස බලා
 හීන දකින මා
 
 ආදරයෙන් වැලඳගන්නා සුන්දර
 පෙම් යුවලක් දෙස දෑස් නොවසා
 බලා සිටින මා
 
 සිහි කළේ ,
 මේ සැම හීනයක්කර
 සදහටම අහිමි වූ ඔබේ උණුහුම පමණයි...
 
 

සරදමක් නොවූ ප්‍රේමය
--- ~


 
 
 නිහඬ හිස් පිටු මකා අඳුරේ...
 ගොතමි කවි පද හැඟුම් අතරේ ...
 මාත් රහසින් හඬමි සොඳුරේ...
 ලැගුම් ගෙන නුඹෙ මතක සයුරේ...
 
 ගොළු කතාවක සියුම් පදයේ ....
 සතුට කෙලෙසද වීයැකි යනුයේ...
 අසල හිඳුමට නොහැකි කතරේ ...
 හඬා වැලපෙමි කුරිරු තනියේ ...
 
 ඇයිද මෙතරම් දරුණු සසරේ ...
 හමුවුණේ අපි නැවත භවයේ...
 පතා ආවත් නැහැනෙ බැඳුණේ...
 සරදමක් නොව මගේ ආලේ ...
 
 හද සිතුවම් වර්ණ හැංගුවේ...
 කවුදෝ අපේ ඉරණම් ගමනේ ...
 නැවත හමුවුවොත් සසරේ...
 එපා යනු මා හැරදා පාළුවේ...
 
 මියැදුණු තනුවේ ස්වර පැටලේ...
 මවනු බෑ එය පෙර ලෙසේ ...
 කෙසේ නික්මෙනු හැකිද රහසේ ...
 තවම නැහැ එය වැටහුණේ ...

Week of මාර්තු 13, 2024