තරුණී හිමිදිරිය ඔබගේ නිර්මාණ පළවන කාන්තා පුවත්පත් අතර ජනප්‍රියතම කවි පිටුවයි. ඒ සඳහා ඔබේ නිර්මාණ අපට එවන්න. ප්‍රවීණ කවි කිවිඳියන් විසින් තෝරාගනු ලබන හොඳම කවිය ඔබේ කවිය කරගන්න. ඔබේ නිර්මාණ හිමිදිරිය, තරුණී, ලේක් හවුස්, කොළඹ 10 ලිපිනයට හෝ 0715927752 අංකයට whatsApp කරන්න.
අද හිමිදිරියට කවි තෝරන ඔහු ජයන්ත කහටපිටිය
දීර්ඝ කාලයක් පුරාවට පුවත්පත් තීරු ලිපි රචකයකු ලෙසින් මෙන්ම සාහිත්‍ය හා සිනමා විචාරකයකු වශයෙන් ද කටයුතු කරන හෙතෙම දක්ෂ කවියෙකි. ඔහුගේ පළමු කාව්‍ය සංග්‍රහය වන්නේ ‘විවාහකයාගේ ප්‍රේමප්‍රාප්තිය”යි.
දෙවැන්න ‘ශේෂ වන සේ සිනහව.මකා දැමිය හැකිද රේඛාව”. ඊට අමතරව යොවුන් සාහිත්‍ය සහ ළමා සාහිත්‍ය කෘති ගණනාවක් ද රචනා කර ඇති ජයන්ත මහතාගේ නවතම යොවුන් නවකතාව
“සීගිරි කාශ්‍යපට BIRTHDAY CAKE එකක්” කෘතියයි.
---------------------
හොඳම කවිය
එකම ජීවිතයක
ගිලිහී වැටෙන කල
වියැළුණු පතක්
දැනෙයි එහි දුක පොළොවට
මලක් පූදින කල
තුරු හිස
සුළඟ දිවැවිත්
අහුලා ගනී එහි සුසුවඳ
අහස දුර යැයි හැඟුණද
හෙළන දයාර්ද දිය බිඳු
තුරුලතාවට
පොළොවට නොවෙද
සැඟවී පොළෝ ළමැදේ
සිහිල උල්පත්
නිබඳව ගලා නොහැ‍ෙලද
මූල මණ්ඩල සැඟවී
පොළෝ ගැඹරේ
තුරු මඩුලු ඔසොවා නොහිඳිද
වැසි බි‍ඳක සැඟවූ කඳුළෙක
පවනත පැවරූ සුසුමෙක
තුටු හසරැල්ල තබා කුසුමෙක
මේ අප විඳිනු
එකම ජීවිතයක රස නොවෙද
එකම පොළොවක
එකම අහසක් යට
චමින්ද රොෂාන්
"එකම ජීවිතයක" නමින් චමින්ද රොෂාන් විසින් නිර්මාණය කරන ලද මේ කාව්‍ය නිමැවුමට, කවියක තිබිය යුතු මූලික ලක්ෂණයක් වන සෞන්දර්යාත්මක ගුණය සහ එහි ආලෝකය, මැනවින් ලැබී තිබෙන බව පෙනෙනවා. කවිය කියන්නෙම රසිකයා හා භාෂාව අතර සියුම් අන්තර් ක්‍රියාවකට මඟ සලසන්නක්. එය තුළ කවියා හා රසිකයා ගැඹුරින් හා බැරෑරුම් විදිහට යම් ප්‍රඥා සහගත චමත්කාරයකට අවදි කරවන්න පුළුවන්නම් ඒක හරි වටිනවා. චමින්දගෙ මේ නිර්මාණයත් සොබා දහමේ පොදු ධර්මතාවක් ගැන අපේ මනස අවදි කරමින් එහි සැඟවුණු හේතුඵල දහමට එකඟ දයලක්කිත සමබරතාව ගැන දයාර්ද සංවේදනාවන් ඇතිකරනවා.
නිර්මාණ සඳහා වඩාත් අපූර්ව වස්තු විෂයයන් සොයා යමින් , ඒවා අනන්‍ය ලක්ෂණ සහිතව රසිකයා වෙත ඉදිරිපත් කරමින්, තම කවිතාව දියුණු කර ගැනීමට ඔහුට වාසනාව ලැබේවායි ප්‍රාර්ථනා කරනවා.
-------------------
ආරාධිත කවිය
රාධිකා නම් මධු සපයන්නියගෙ කාරිය...
සෑම මධු බඳුනක් ම
සමාන පරිමාවකින් පුරවා
හිස් බව නොපෙන්වීම ය
මදි යැයි කියනවිට
ඇති යැයි වළකන තෙක්
නැවත නැවතත් පිරවීම ය
මුවවිට පිරුණු බඳුනක
ඉතිරෙන පෙණ සීමාකොට
මාත්‍රාව නිවැරදිව පෙන්වීම ය
මාත්‍රාව ඉක්මවා ගියකල
මත් බඳුන් සඟවා
තැන් තැන්වල
බමනතා පිරිමැදුම ය
පුරවන පුරවන බඳුනෙන්
විතක් සංග්‍රහ ලැබුණු විට
මහත් සේ මත් වූ බව රැඟුමය
රාධිකා නම් මධු සපයන්නියගේ කාරිය.
රසිකා මුහන්දිරම්ගේ
---------------------------
ඇති ද...? වෙනසක්
දුකේදී දුක්වීම සැපේ දී තුටුවීම
තිරිසනා ළඟත් ඇත
මෙලෙසමයි මිනිසා ද කරන්නේ
මේ දියත
දෙපිරිසේ වෙනස ගැන වියත් මත
බොහෝ ඇත
අන්තවාදී නොවී දිවි මඟෙහි පුරාවට
සැරිය යුතුමැයි මැදුම් මාවත
රත්නසේකර රූපසිංහ
කිතුල්ගල
------------------------
පුංචිම තරුවක්
හෙටක් උදාවන්නට
ඇතත් හෝරා කිහිපයක්ම
සීත සුළං හමනා
හුදෙකලා රාත්‍රියේම
ඈත සිට මෑත බල බලා
තරුවක් පුංචිම
කඳුළක කතාවක්
මුමුණාවි රහසේම
වලාපෙළ අතරින්
නැඟ එනා සඳට
කවියො කවදත් කවි ලීවාට
නුබ තනි නොකරාවි
අමාවක දාට
තුති ගී නොඅසාම
දිලෙන තරු රෑට
ටී. නිපුණි සමෝද්‍යා වත්තේගම
බෙලිඅත්ත
-----------------
මැණික් සඳක්
මගේ සිහින මාලිගයේ
නිතර පෙමින් හද සැනසූ
පුංචි සොඳුරු ප්‍රේමියේ
සඳ එළියේ ළඟටම වී
මට හරි ආදරෙයි කියා
කිමැයි හනික සැඟවුණේ
කොයි අත නුඹ ගියාදෝ
ළය පැලේවි සෝ තැවුලින්
එනු මැන මා නෙතු මඬලට
අහස බලන විට බැබළෙන
සඳරේඛා සේ
පොළොව බලන විට දිදුලන
නිල් මැණිකක් සේ
ලීල් චන්ද්‍රසිරි
නෑගම්පහ
-------------------
ආදරණීය කඳුළ
ජීවිතේ මනරම්
කඳුළු නුඹ මා ළඟ නම්
හිතුවේ නෑ මා නම්
ළඟ හිඳී යැයි මෙතරම්
දෑස් ළඟ හිඳිමින්
මා තනි නොකළ වග නම්
කියනුවද කෙලෙසින්
එයයි සත්‍යය ලොවට රහසින්
සිනා මල් පූදින
දිනක් ඒදැයි නොමදැන
හිතන්නත් පෙර ඇවිත්
ඇයි දෙකම්මුල් සිපගෙන
ශ්‍රියානි වීරසිංහ
දර්ගා නගරය
----------------
අතීතයේ දවසක්
ඉතා ම ඈත දවස්වල
හිස් ඩෝල්කියකට
තඩි බාමින්
ජීවිතයේ සතුටු
නාද නැගීය..
කණේරු ගස් පේළියට ඈතින්
උගුරැස්ස කහට දත්වලින්
දම්මි
සිනාසුණාය....
කොට බිත්තියෙන්
නැමී ගෙන
හක්කොළං කරන කොට
නන්දා
ඇස් කොනින් කතා කළාය....
දවසක් සංගීත කාමරේ
පිටිපස්සේ
මසං පොකුරක ඔතා
ගෲෂා සිය
හදවතම
දිගු කළාය....
පොල් පිත්තේ කෙළවරක
වැරෙන් වැදුණු
සතුටු හතරේ පහරක්
වැටට උඩින් පියඹා ගියේය....
මිහිර බණ්ඩාර හේරත්
