වෙලාවත් දැන් ළඟයි වාගේ
පුතා ගෙදරට ඇතුළු වන්නට
ගියා නම් දැන් තේ හදන්නට
මහන්සියෙ එන හිත හදන්නට

දුවේ! මට හැකි ඉතිරි වැඩ ටික
කරගන්නම් මාත් හෙමිහිට
හිතේ සෙනෙහසෙ තරම දන්නව
නුඹේ උසටත් වැඩිය උස බව

ආ..ං! අර ගෙයි දොරත් ඇරෙනව
දුවල යන්නකො හිනහවක් ගෙන
තවත් උළුවස්සක් පනින්නට
එපා ඒකට කරුණු දෙන්නට

නොරිස්සුම ඔය හිතේ ගුලිවුණ
ළිපට දාහං අළුව යන්නට
අනේ පොඩි දුව ගිහින් බලපන්
ළමයි කියලා මක් කරන්නද?

සතුටටත් කඳුළු එන
නෙතුපියන් වැසූ මුත්
කොපුල් තල සිපිමින්ම
කඳුළු වැල් ගලා යයි..

ළඟ ළඟම දැවටෙනා
නුඹේ උණුසුම් සුසුම්
විරාගික ප්‍රේමයක
සිනහ රේඛා මවයි..

අනාගත සිහිනයක
පහන් තරුවක් ලෙසින්
නෙත් කතන්දර මතින්
ප්‍රේමයක ස්වර වැයෙයි..

වන උයන පසුබිමින්
දිසෙයි දළදා මැදුර
බොදු බැතිය නංවමින්
ඇසෙයි තේවා නාද

සැරසී සුදු පිරුවටින්
ඇහැළ මල් වියන් යටින්
පෙළ ගැසෙයි සැදැහැ දන
මාලිගා දොරකඩට
වඳිනු වස් දළදාව

නිරන්තර රළ බිඳෙන
රැළි නඟන කිරි මුහුද
දසත දිය විසිරෙනා
කෝපි මල - වතුර මල

මල් පිපී දිදුලනා
විසල් තුරු සැම තැනම
තුරු වියන් මල් උයන්
මල් පිපී සුවඳ දෙන
සරසවිය වැඩ සිටින
හන්තාන විදු පියස
එහි අසිරි සිරි මහිම
නොබලනා නෙත් කුමට
කොයිතරම් ලස්සනද
අපේ ගම මහනුවර