පිලේ ගොම මැටි උළා ළිප ළඟ
කැවුමෙ කොණ්ඩය තබමිනා....

නොනගතේ වෙහෙරට ගොසින් මල්
තබා පහනක් දල්වනා....

දහසකුත් වැඩ තනිව කරමින්
කුමරි අවුරුදු ගෙට ගෙනා....

ලෝකයට මා ගෙනා අම්මා
ලොවෙත් නැති බව සිහි වුණා....


හදා කිරිබත උයා අතිරස
නැවුම් රෙද්දෙන් හැඩවෙනා....

මවට බිරියට කෝණ මඟුලෙදි
ඉබේ මුල්තැන හිමිවුණා....

වඩමවන්නට අග්නි දෙවිඳුන්
සිටිය යුතු මුත් නැකතිනා....

පොලිස් ළඳ රෝහලේ හෙදියට
ඉන්න ළිප ළඟ බැරිවුණා....


කාසියෙන් මිල නියම වෙන තැන
ජීවිතේ ළඟ පැරදෙනා....

ළඳක් වීදියෙ අලෙවිකළ ගත
විටදි ලෝකය නිදියනා....

සිටිය මුත් ගෙය හිරුට ඉඩ දී
මීනයෙන් මේසෙට යනා....

නැකත් කුමටද එවුන් ඇවිදින්
කලෙත් ගනුදෙනු රහසිනා....


සිපිරිගෙට ගිය හේන්පිටිවල
දා හෙළන ළඳ නොදකිනා....

රෙද්ද හැට්ටය ගවුම ඔසරිය
ඇඳන් තාලෙට පාවෙනා ....

මීඩියාවල රඟන ලලනා
රබන් ඔංචිලි බලමිනා....

සැබෑ අවුරුදු කුමරි කොයිදැයි
කියා මගෙ සිත වැළපුණා....



වෛද්‍ය නිලධාරී
බන්ධනාගාර වෛද්‍ය ඒකකය
බදුල්ල