සෝෂල් මීඩියාවල
 දුක ෂෙයාර් කෙරුවට
 අහන්න කවුරුත්
 හිටියේ නෑ ළඟ
 කවිය අසිපතක් නොව
 සියපතක් වී
 පිපුණාය සිත් විල මත
 වැලට ගත් ගෙඩි
 වැලට බර නැත
 සිරස මත පුත නුඹ
 දෙඋර මත දියණියනි
 නුඹ දෙදෙන
 මහගිරිදඹ නඟිමි
 නැත වෙහෙසක්
 කඳුළ පිස දැමූ මඳ පවන නුඹලාය

 

 කොච්චරක් ලස්සනට දිලිසුනත්
 සමහර මතක..
 තරු අතර.
 
 ඉස්තරම් ලෙස පැරණි වූ මුත්
 රස බලන්නට නොහැකි වූ
 වයින් බඳුය..
 සමහරක්..
 යුග යුග ගණන් දිග - කතන්දර
 
 ඇතිතරම් බදා සිප නැතත්
 වැඩියෙනුත් වෙන්ව ගොස් හැඬූ
 සාංකා පෙරා ගත්තොතින්
 මණ්ඩි වල තිබෙයි
 පොඩි පොඩි හබ
 එතරම් නොවූ පෙම්බර
 
 රත්තරන් ඒ කෙසේ වුණත්
 මැදියමේ සවන් මත වැකී
 හුණුව යයි ලේ නහර..
 ගී හඬක කව් පෙළක පවා
 සඟවා කවා ඇත.
 ඔබ නොලද හෙයින් මා ලද
 අළු නොවෙන ගින්දර
  

 
 
 ලේක් හවුස් ආයතනයේ දිනමිණ විශේෂාංග අංශයේ මාධ්‍යවේදිනියක් ලෙසින් කටයුතු කළ ඈ අමුතු කවි එක්ක බැඳුණු අමුතුම ශෛලියක් තියෙන කවිකාරිනියක්. ඒ වගේම සයිබර් කිවිඳියක්. දක්ෂ කෙටිකතා ලියන්නියක් පමණක් නොව, අපූරු නවකතාකාරිනියක්. කාංචනා ලියූ ‘ගුහා සටන’ නවකතාව වාගේම ‘ගම්මිරිස් කුරුල්ලා’ කෙටිකතා සංග්‍රහයත්, ‘ප්‍රේමයේ කාර්තු, බූමරංගය ඔබේ ඇස් දෙක, කාල රේඛාව' වැනි කාව්‍ය සංග්‍රහත් දැඩිව පාඨක සිත් ඇදබැඳ ගන්නට සමත් වුණා. විවිධ තේමාවන් නැවුම්ව සහ කදිම භාෂා විලාසයකින් අකුරු කරන ඕ අපේ කාලයේ අපූරු ලේඛිකාවක්.