තරුණී හිමිදිරිය ඔබගේ නිර්මාණ පළවන කාන්තා පුවත්පත් අතර ජනප්‍රියතම කවි පිටුවයි. ඒ සඳහා ඔබේ නිර්මාණ අපට එවන්න. ප්‍රවීණ කවි කිවිඳියන් විසින් තෝරාගනු ලබන හොඳම කවිය ඔබේ කවිය කරගන්න. ඔබේ නිර්මාණ හිමිදිරිය, තරුණී, ලේක්හවුස්, කොළඹ 10 ලිපිනයට හෝ 0715927752 අංකයට WhatsApp කරන්න.
 

හොඳම කවිය ඔබේ කවිය වුවහොත් ඔබට තිළිණයක් හිමි වේ. එබැවින් නිර්මාණය සමඟ ඔබේ නම, ලිපිනය, දුරකතන අංකය එවන්නත් අමතක කරන්න එපා.

හොඳම කවිය

මගෙ නම බිම්බා දේවි වර්ණකුලසූරිය ස්වාමීනී
සිද්ධාර්ථ කෙනෙක් වෙනුවට
දේවදත්ත කෙනෙක් මුණගැහුණේ
කයිමන් දොරකඩදි ස්වාමීනී
බොහොම හදිසියෙන්
කෝච්චිය අල්ලගන්න
දුවමිනුයි හිටියෙ මම
කඩුගන්නාවෙ කන්ද නගින්න
පටන් ගන්නකොටමයි
අපි ප්‍රේමවන්තයො වුණේ
නෙළුම් කුලුන විතරක් නෙවෙයි
අයිෆල් කුලුනත් මුලින් උදුරන්
මගේ පාමුල ගෙනත් තිබ්බා
ගමනාන්තෙට ළඟා වෙද්දි

නුවරින් බැහැල ගෙදර ගියෙ
රටක් රාජ්‍යයක් අයිති කරගෙන
එදා ඉඳන් හීන මැව්වෙ
අයිෆල් කුලුනටත් වඩා උසට
ආදරේ දෙන්න
ඒ වගේම ගන්න
ජීවිතේ පුරාවටම

ඒත් දවසක් ඔෆිස් එකේදි
පොඩි කසු කුසුවක් ඇහුණා
රෑ ගෙදර බත් මුට්ටිය
පොඩි වුණා
පොඩි උන් බඩගින්නෙම
හීනෙන් ඉකිගැහුවා
එයා ආයෙත්
අර අයිෆල් කුලුනම
උදුරගෙන ඇවිත්
අපෙ ඔෆිස් එකේ සුන්දරීගෙ
පය පාමුල තියල තිබුණා
ඒ හින්දා ගෙදර තුන් බියම
ඇතිවුණා ස්වාමීනී
දුර්භික්ෂ බිය
යුද බිය
මරණ බිය
බැරිම තැන තමයි සුන්දරීව
ජේතවනාරාමෙ ළඟ කානුවෙ
හංගල දැම්මේ
ඒක කළේ මමයි ස්වාමිනී
වරදකාරිය මමයි


 

හිමිදිරියට අද කවි තෝරන ඇය
කාංචනා අමිලානි


ලේක් හවුස් ආයතනයේ දිනමිණ විශේෂාංග අංශයේ මාධ්‍යවේදිනියක් ලෙසින් කටයුතු කළ ඈ අමුතු කවි එක්ක බැඳුණු අමුතුම ශෛලියක් තියෙන කවිකාරිනියක්. ඒ වගේම සයිබර් කිවිඳියක්. දක්ෂ කෙටිකතා ලියන්නියක් පමණක් නොව, අපූරු නවකතාකාරිනියක්. කාංචනා ලියූ ‘ගුහා සටන’ නවකතාව වාගේම ‘ගම්මිරිස් කුරුල්ලා’ කෙටිකතා සංග්‍රහයත්, ‘ප්‍රේමයේ කාර්තු, බූමරංගය ඔබේ ඇස් දෙක, කාල රේඛාව' වැනි කාව්‍ය සංග්‍රහත් දැඩිව පාඨක සිත් ඇදබැඳ ගන්නට සමත් වුණා. විවිධ තේමාවන් නැවුම්ව සහ කදිම භාෂා විලාසයකින් අකුරු කරන ඕ අපේ කාලයේ අපූරු ලේඛිකාවක්.


මේ කියන්නේ පෙම් කතාවකි. නමුත් මේ පෙම් කතාවේ කොටසක් ගලා යන්නේ සම්මත රේඛාවට මඳක් ඔබ්බෙනි. කතානායිකාවට හදිසියේම කයිමන් දොරකඩදී පෙම්වතකු මුණ ගැසීමත්, ඇගේ ජීවිතය ඉන්පසු අතිශය සුපෙම්වත් වූ ආකාරයත් විස්තර කරන්න කිවිඳිය තෝරාගෙන ඇති භාෂා ප්‍රයෝග සරල මුත් ඒවායේ ප්‍රතිඵල බැරෑරුම් ය.

කයිමන් දොරකඩ වචනාර්ථයක් ලෙස නොගෙන ඉතිහාස පෙම් කතා ද, ප්‍රකට ගීත ද මතක් කරවමින් කතානායිකාව දුම්රියට ගොඩ වෙයි. ඒ පෙර කී තරුණයා සමඟිනි. කඩුගන්නාව කන්ද නඟින්න පටන් ගන්නා විටම පෙම්වතුන් වූ බව කවියෙන් කියවෙයි. නෙළුම් කුලුන, අයිෆල් කුලුන ආදී සියලුම උසැති කුලුනු ඇගේ පය පාමුල පෙම්වතා ගෙනැත් තබන්නේ ගමනාන්තයට ළඟා වන විටය. මේ සා වේගයක් සහිත ප්‍රේමයක අවසානය ද එතරම්ම වේගවත් විය හැකි බවට කිවිඳිය ඉඟියක් ලබා දෙන සැටියකි.
පෙර කී හදිසි පෙම් කතාව පල දරා, ඔවුන් විවාහප්‍රාප්තව දරුවන් ලබා සතුටු කුටුම්බයක දිවි ගෙවන අතර, කන්තෝරු කසු කුසුවක් ගැන කියමින් කිවිඳිය බෝම්බයක් හෙළයි. ඉක්බිතිව කවිය තමන්ට හිමි කඳු මුඳුන තරණය කරන්නේ ඊට අනපේක්ෂිත අවසානයක් ලබා දෙමිනි.
කියවන්නා තුළ හදිසි කම්පනයක්, සිතීමට දොරක් විවර කිරීමට සමත්කමක් දක්වන්නේ නම් ඒ කවිය තම රාජකාරිය හොඳින් ඉෂ්ට කර ඇතැයි කිව හැකිය. එමෙන්ම, කවියකින් යමක් නොකියා රූප පෙන්වීමට කිවිඳිය දන්නා බව හැඟෙන හෙයින් අද 'හිමිදිරිය' කවි පිටුවේ හොඳම කව වන්නේ මෙයයි.

මේ අතරම, හැකි තරම් වචන පාවිච්චියට ලෝභ වීමට උගන්නා ලෙස කිවිඳියට යෝජනා කරමි.