උපුටා ගැනීම

 

ශෝක දනවන තත්ත්වයක් නම්
මල් වඩම් ගෙන පිදේ
පියුම් සුපිපෙන විල් තෙරක් වූව
ඉඩෝරයකදි හිඳේ
ඉතා සීමිත ක්ෂණයවල්වල
සුසුම් උපරිම රිදේ
ප්‍රේමණීයම කතා තුළදිත්
බැඳෙන තැන් යළි බිඳේ

ගොඩබිමක මියයන රළක් වුව
වෙරළ වෙතටම ඇදේ
සුවඳ වැඩි ලස්සන මලක් හෙම
උසම ඉතිවල හැදේ
ප්‍රේමයත් මිහිරිම තැනක් විට
කඳුළ කෙළවර රැඳේ
අමතකම කළ යුතු දෙයක් නම්
මතකවල යළි බැඳේ

ලබා ගන්න පුතු පණ නල ..
සිඳී ගිය
නොමළ ගෙයින් අබ දෙමිටක් ..
සොයා ගිය
මවක් වෙතට වසවත්
මරු සිනා විය
කිසාගෝතමී වත බණ...
පොතේ විය

නොමළ දරුවො
කෙලෙසෙනු දැක ..
තැවී ගිය
බොහෝ සිටක
අපි ඈ ගැන කතා විය
එදා ඇයට කරුණා ඇස ..
තෙමී ගිය
බුදුන් මෙදා වඩිනට නම් ..
පමා විය

නොමැති නිසා දරු සෙනෙහස් ..
පිනා ගිය
උපත්වලට පෙර ගබ්සා ..
බොහෝ විය
දෙකලවා මැදින් රහසේ ..
ගලා ගිය
රුහිරු අතර මවු දෙවඟන ...
ඇයම විය

තෙලෙස් වස් දුවක් ..
වැටකොටු පැනල ගිය
පුදා තිබේ ලිඟු සතකට ..
ළමා විය
අසා පුවත නවතා ඇස ..
කඳුළු දිය
කිසාගෝතමී මැරුණා ..
පැළී ළය.
 

ගාමිණී මද්දුමගේ
වෛද්‍ය නිලධාරී
බදුල්ල බන්ධනාගාරය
 

වර්තමානයේ බහුලව ඇසෙන දරුවන් දූෂණය කිරීම, ගැබ්ගත් මවුවරුන් කලල ගබ්සා කිරීම වැනි අමානුෂික ක්‍රියා දෙස කවියා බලන්නේ කිසාගෝතමීගේ කතාව කේන්ද්‍රයේ තබාගෙනය. එහෙයින් දරුසෙනෙහස ගැන යමක් සංවේදීව ප්‍රකාශ කිරීමට කවියා සමත් වෙයි.

ඒ අර්ථයෙන් ගත් විට මේ කවියා, කවිය සංවේදී සමාජයක් වෙත මිනිසුන් අවදි කර තබන මාධ්‍යක් යන වැටහීමෙන් ක්‍රියා කරන බව ද පෙනේ. කිසාගෝතමිය පිළිබඳ පැරණි කතාව පාදක කර ගැනීම නිසා කවිය වාර්තාමය ස්වභාවයෙන් මිදෙයි.

මනරම් හැඟුමකි සිත තුළ මැවෙනා
නොයිඳුල් පැතුමකි සිත පුබුදවනා
ළබොළඳ හදවත් මුසපත් කරනා
කුලුඳුල් ප්‍රේමය මෙය වෙයි අගනා

මුවඟින් පෙම්බස් දෝරේ ගලන්නේ
ආදර හසුනුයි අකුරු කරන්නේ
පෙම් සිතිවිලි සිත සතුට ගෙනෙන්නේ
මුල් පෙම නැත මතකයෙන් මිදෙන්නේ

බිඳුණු දිනේ හද තැවුල් මවන්නේ
කඳුළු සුසුම් මැද සිතයි දැවෙන්නේ
නැත පෙම්බර වත අමතක වන්නේ
පෙම් සටනින් ජය සැම සුපතන්නේ