තරුණී හිමිදිරිය ඔබගේ නිර්මාණ පළවන කාන්තා පුවත්පත් අතර ජනප්‍රියතම කවි පිටුවයි. ඒ සඳහා ඔබේ නිර්මාණ අපට එවන්න. ප්‍රවීණ කවි කිවිඳියන් විසින් තෝරාගනු ලබන හොඳම කවිය ඔබේ කවිය කරගන්න. ඔබේ නිර්මාණ හිමිදිරිය, තරුණී, ලේක් හවුස්, කොළඹ 10 ලිපිනයට හෝ 0715927752 අංකයට whatsApp කරන්න.

එල කොල්ලෙක් මං
මල් දෙන්නම් මං....
 

මේ කවියේ උද්ධෘතය අප සැම දන්නා " මල් කෙල්ලක් මං, මල් දෙන්නම් මං " යන ප්‍රකට ගීය ඇසුරෙන් සකසා යම් අන්තර් පථීතමයි උත්ප්‍රාසයක් මතුකරයි. මෙහි වස්තු විෂය නැවුම් එකකි. සංචාරකයන් සහිත බස් හඹා ගොස් මල් විකුණන තරුණයෙකුගේ ආත්ම ප්‍රකාශනයක් මෙහි එයි. වාහන තුළ යන තරුණ තරුණියන් සතු යැයි ඔහු සිතන දිවිය සහ තමන්ගේ දිවිය සසඳා එහි උත්ප්‍රාස වෙනස බලන්නට අපට අමතන අතරම සුපුරුදු ශෝකයක් කරා අප රැගෙන නොගොස් සිය අභිමානය සහිතව සිටගනී. එම දැක්ම අපූරුය. ඔහු මෙහි අදාළ තරුණයාගේ මනෝභාවයන් ගෙනහැර දැක්වීමට ඉතා සුදුසු මේ මොහොතට අදාළව ජනවහරේ එන යෙදුම් සහිත ඉතා උචිත බසක් යොදාගනී. එමෙන්ම සිහිල් පවන තැනුණු අයුරු ඔහු අපට කියාදෙයි. ආකර්ෂණීය සංචාරක ස්ථාන පසුපස ඇති කතාවක් ඔහු ලුහුඬු බසින් මේ කවිය තුළ රැගෙන එයි. මෙය අපූරු රසයක් සහිත කවියකි.

එළ කොල්ලෙක් මං
මල් දෙන්නම් මං.........

හදා මල් මිටි රැයේ මැදියම
උදෑසන මා පියාඹන විට
ලේලන්ඩ් යන්නෙ මහ ලොකුවට
මං අජානේය තුරඟෙක් එතකොට
හිස දමා කවුළුවෙන් එළියට
අත වනා යන්න යනකොට
දිව්ව දෙපයට මාවතේ මල්
බුමුතුරුණු දැම්මා වගෙයි
වංගුවෙන් එනකොට මමත් ඒ
ගැම්මෙන්ම ඉස්සර වුණයි
ලේලන්ඩ් වට වංගු නඟිනකොට
වෙද මුල්ල කන්ද පැනල මං
පිළිගත්තෙ ආයෙත් මල් දෝතම දිගු කරන්
පැරදුණේ නෑ මමයි ෆස්ට්
උඩ පහළ දුවන එක
මහ කජ්ජක් නෙවෙයි
මේ කකුල් දෙක තියෙනකම්
නොගත්තත් මගෙන් මල්
තරහ නෑ මං දුන්නේම හිනාමල්
කප්පරක් දුක් හිසින් අරගෙන
හිනැහුණත් මං හාමතේ
තරගයක්මයි ජීවිතේ
මං හුස්ම ගත්තේම නෑ ඒ ටිකේ
සුළඟ සිහිලැල් පවන්
සැලුවෙ මගෙ දා බිඳු අරන්
මගෙන් මල් මිටි අරන්
ගියා ස'ප්‍රයිස් වුණ කුමර කුමරියන්
මේ සයිබර් අවකාශයේ
මල් කුමාරයෙක්ලු මං
නෑ....අනේ එළ කොල්ලෙක් මං

 

අද හිමිදිරියට කවි තෝරන ඔහු ඉසුරු චාමර සෝමවීර

කවිය, කෙටිකතාව සමඟ වසර ගණනාවක් තිස්සේ කටයුතු කරන ඉසුරු " සුද, තාණ්ඩව, අප දෙදෙන මැද මහ මුහුද " යන කාව්‍ය සංග්‍රහයන් ද " මලක් කතා කරයි, ගැහැනු පිරිමි මල් පලතුරු " යන කෙටි කතා සංග්‍රහයන් ද පළ කර ඇත. එදිනෙදා ජීවිතයේ ඇති උත්ප්‍රාසයන් සිය ලිවීම් ඔස්සේ ගවේෂණයට ඔහු වැඩි නැඹුරුවක් දක්වයි. සුළුතර ලිංගික ප්‍රජාවන් සම්බන්ධ ප්‍රස්තුත ඔහු නිතර සිය ලිවීම් තුළට හසුකර ගනී. වසර බොහෝ ගණනක් තිස්සේ ලිවීම් සමඟ සිටින ඉසුරු ජාතික මට්ටමේ සාහිත්‍ය සම්මාන කිහිපයක් ද දිනා ඇත.