තෙල් රහිත මස්, නැවුම් එළවළු හා පලතුරු සහ කුරුට්ට සහිත ධාන්‍ය වර්ග වැනි විවිධත්වයකින් යුතු ආහාර ගැනීම මඟින් අත්‍යාවශ්‍ය පෝෂ්‍ය පදාර්ථ ගණනාවක් ශරීරයට පහසුවෙන් ලබාගත හැකියි.

ශරීරයේ බර වැඩි වීම නිසා බොහෝ කාන්තාවන් අද ශාරීරිකව මෙන්ම මානසිකවත් පීඩාවට පත්වනවා. බර වැඩි වෙනකොට ශරීරයේ හැඩයත් ඉබේටම වගේ වෙනස් වෙනවා. පුරුෂ පාර්ශවයට වඩා කාන්තාවන් ශරීරයේ හැඩය ගැන වැඩිපුර හිතනවනේ. ඒ වගේම ඔවුන් අන්‍යයන් සමඟ තමාව සංසන්දනය කරන්නත් හරි දක්ෂයි. ඉතින් ඒ නිසා අද කාන්තාවෝ වැඩි දෙනෙක් ශරිරයේ හැඩය රඳා පවත්වා ගන්න කුමක් හෝ ව්‍යායාමයක නිරත වෙනවා. හැබැයි මේ ව්‍යායාම කරන්නන් වාලේ කරගෙන ගියොත් සුබදායි ප්‍රතිඵලවලට වඩා අසුබදායි ප්‍රතිඵලවලට නම් ඉක්මනින්ම මුහුණ දෙන්න සිදු වේවී. ඒ නිසා ව්‍යායාම කරන කාලයේදී හරි නීති පිළිපැදීම ඉතාම වැදගත්.

සෙමෙන් ආරම්භ කරන්න

එකවරම සියලු ව්‍යායාම කිරීමට හෝ වැඩි තීව්‍රතාවයකින් ව්‍යායාම ආරම්භ කිරීමට උත්සාහ කිරීම නම් එතරම් හොඳ දෙයක් නොවේ. ඔබ ව්‍යායාම කිරීමෙන් අනතුරුව ඇතිවන වෙහෙසකාරී බව ගැන සැලකිලිමත් නම්, ඔබ කරන නරකම ක්‍රියාවක් ලෙස එය හැඳින්විය හැකිය. උදාහරණයක් ලෙස ඔබ මින් පෙර කර ඇත්තේ කිලෝමීටර් 2 ක් සෙමෙන් දිවීම නම්, එකවර කිලෝමීටර් 5 ක් සෙමෙන් දිවීමට උත්සාහ කරන්න එපා. මුලින්ම ව්‍යායාම කිරීම ආරම්භ කරන විට ඇවිදින්න. එයට ඔබේ ශරීරය හොඳින් හුරුවූ පසු කෙටි දුරක් සෙමෙන් දිවීමට පුරුදුවන්න. කාලය ගතවත්ම, දුවන දුර හෝ කාලය ක්‍රමයෙන් වැඩි කරන්න. ඉතා ඉක්මනින් ව්‍යායාම බොහෝමයක් හෝ වැඩි තීව්‍රතාවයකින් ව්‍යායාම කිරීමට උත්සාහ කිරීමේ ප්‍රතිඵලය වන්නේ, ව්‍යායාම කිරීම අවසානයේදී වෙහෙසකාරී බවක් දැනීම පමණි.

ව්‍යායාම කිරීම සඳහා විශේෂඥයින් දිනකට විනාඩි 30 ක් බැගින් සතියකට දින 5 ක් නිර්දේශ කරයි. එහෙත් ව්‍යායාම කිරීමේදී, යහපතට වඩා හානියක් වීමට හැකි වන ආකාරයේ වැරදි ඔබ අතින් සිදුවීම වළක්වා ගැනීමට ප්‍රවේශම් වන්න.

“වෙන වැඩ නිසා අද ව්‍යායාම කරන්නේ නැහැ” යයි නිදහසට කාරණා තමන් විසින්ම ඉදිරිපත් කරමින්, ව්‍යායාම කිරීම කල් දැමීමෙන් හෝ මග හැරීමෙන් ඔබ ව්‍යායාමවලින් මෙතෙක් ලබාගත් ප්‍රගතිය අහිමි වෙනවා පමණක් නොව, ඔබේ මුළු ව්‍යායාම වැඩසටහනම නැවත මුල සිටම ආරම්භ කිරීමට සිදු වෙයි.

 ඔබේ ආහාර වේල ගැන සැලකිලිමත් වන්න

ව්‍යායාම මඟින් වැඩිපුර කැලරි හෙවත් ඉන්ධන දහනය වන විට, ශරීරය නිසි පරිදි පවත්වා ගැනීමට වැඩිපුර කැලරි ලබා ගැනීමට සිදු වෙනවා. ව්‍යායාම කිරීම ආරම්භ කිරීමට පෙර නිවැරැදි ආහාර වර්ග ප්‍රමාණවත් ලෙස නොගැනීමෙන්, ව්‍යායාම කිරීමෙන් පසුව ශරීරයේ ශක්තිය සිඳුනු බවක් දැනෙයි. ඇතැම් විට, ශරීරයට රෝගී බවක්ද දැනෙයි. තෙල් රහිත මස්, නැවුම් එළවළු හා පලතුරු සහ කුරුට්ට සහිත ධාන්‍ය වර්ග වැනි විවිධත්වයකින් යුතු ආහාර ගැනීම මඟින් අත්‍යාවශ්‍ය පෝෂ්‍ය පදාර්ථ ගණනාවක් ශරීරයට පහසුවෙන් ලබාගත හැකියි. එවිට, වැඩිපුර ව්‍යායාම කිරීමට ද හැකියාව ලැබෙනවා. එමෙන්ම, ව්‍යායාම කිරීමෙන් අනතුරුව කෙටි ආහාරයක් ගැනීම ද ඉතාම වැදගත්. ඒ සඳහා ව්‍යායාම කිරීමෙන් විනාඩි 30 කට පසුව, යෝගට් එකක් සමඟ පලතුරක් හෝ මේදය අඩු කිරි වීදුරුවක් සමඟ පලතුරක් ආහාරයට ගන්න.

සජලනය කිරීමේ වැදගත්කම

ප්‍රමාණවත් ලෙස දියර පානය කිරීම ද ඉතාම වැදගත් නමුත්, අපට බොහෝවිට මගහැරෙන දෙයක්. එය ව්‍යායාම කරන අතරතුර සහ ව්‍යායාම කිරීමෙන් පසුව පමණක් නොව, ව්‍යායාම කිරීමට පෙර සිටම වැදගත් වන දෙයකි. මක්නිසාද, ශරීරයේ බරින් 60% ක් පමණ ඇත්තේ ජලය වන අතර, සමස්ත ශරීර පද්ධතියම රඳාපවතින්නේ ජලය මතයි. ප්‍රමාණවත් ලෙස දියර පානය නොකළහොත් විජලනය ඇතිවන අතර, එමඟින් ශරීර ශක්තිය සැලකිය යුතු ලෙස පහළ යයි.. ව්‍යායාම කිරීමෙන් පසුව බොහෝ වෙහෙසකර බවක් දැනෙන්නේ නම්, ව්‍යායාම කිරීමට පෙර අතරතුර සහ පසුව වැඩිපුර දියර පානය කරන්න අමතක කරන්න එපා.

විවේකය

වැඩි තීව්‍රතාවයකින් යුතු ශාරීරික ක්‍රියාකාරකම් කරන අතරතුර ශරීරයේ දුර්වල බවක් ඇති වීම සාමාන්‍යයි. එහිදී ව්‍යායාම කිරීමෙන් අනතුරුව ප්‍රමාණවත් ලෙස විවේක ගැනීමෙන් ශරීරයට ශක්තිමත් බවක් ඇති කර ගන්න පුළුවන්. ඔබේ ශරීරයට දරාගත නොහැකි තරම් ව්‍යායාම ප්‍රමාණයක් හෝ තීව්‍රතාවයකින් යුතු ව්‍යායාම කරන්න ‍යන්නත් එපා. එමඟින්, ව්‍යායාමවලට පසුව බොහෝ වෙහෙසකාරී බවක් ඇති වීම සිදුවේ. එසේ කරන්නේ ශරීරයට යහපතක් කිරීමට අපේක්ෂාවෙන් වුවද සැබැවින්ම සිදුවන්නේ ශරීරයට හානියක්. අධි තීව්‍රතාවයකින් යුතු ශාරීරික ක්‍රියාකාරකම් කරනවා නම්, අවම වශයෙන් පසු දිනය වත් විවේක ගැනීම සිදු කරන්න. එවිට ඔබේ ශරීරයට සිදුවූ හානි අලුත්වැඩියා කර ගනිමින් සහ මාංශ පේශි තුළ ඇති ක්ෂය වූ ශක්ති ගබඩා නැවත පුරවා ගනිමින් නව දිනකට සූදානම් වනු ඇත. අධි තීව්‍රතාවයකින් යුතු ව්‍යායාම සිදුකල දිනට පසු දිනද ව්‍යායාම කිරීමට සිදුවේ නම්, පසු දිනට මද තීව්‍රතාවයකින් යුතු ශාරීරික ක්‍රියාකාරකම් තෝරා ගැනීමෙන් ඔබේ ශරීරය නැවත ප්‍රකෘති තත්ත්වයට පත්වීම පහසු වේ.

වෙනත් වෛද්‍ය ගැටලු

නිසි ලෙස ආහාර ගැනීම, විවේක ගැනීම, සහ සජලනය ඔබේ වෙහෙසකාරී බවට පිළියමක් නොවන බව පෙනේ නම්, ඔබේ වෛද්‍යවරයා සමඟ සාකච්ඡා කිරීම වඩාත් උචිතයි. ඇතැම් පෝෂණ ඌනතා සහ වෙනත් වෛද්‍ය ගැටලු එයට හේතුව විය හැකියි. ඒවාට නිසි ප්‍රතිකර්ම කිරීමෙන්, වෙහෙසකාරී බව ඉක්මනින්ම අඩු කර ගත හැකි වේවී.

උපදෙස් -

ශරීර යෝග්‍යතා උපදේශිකා

මෙත්මා බිසේකා නානායක්කාර

[email protected]