නිරතුරුවම අලුත් කතිර රටාවක් නිර්මාණය කරන්නට උත්සාහ කරන ඔබේ දෑතට නව නිර්මාණ රැගෙන එන්නයි තරුණී අපේ වෑයම. මේ අපූරු කතිර රටා ගෙත්තම හැඩ වෙන්නේ හංස ජෝඩුවකගේ රුවෙනි. ආදරයට සැබෑ ආදරණීය සංකේතයක් වන මෙය නව යුවළකගේ නිදන කාමරය හැඩ කරන්න කදිමයි. කිසිදා ආදරය අත්නොහරින මේ ආදරණීය හංස ජෝඩුව පෙම්වතුන්ට ආශීර්වාදයකි. ඒ වගේම විවාහ ගිවිස ගැනීමේ උත්සවයක දී තිළිණ කරන්නත් පුළුවන්.

ආදරණීය හදවත් එකතු කරන හංස ජෝඩුව අදම ඔබේ නිර්මාණ ගොනුවට ගෙත්තම් කර ගන්න.

අඟලට කොටු 10,11ක් හෝ 14ක් ඇති සුදු පැහැති අයිඩා රෙදි

නොම්බර 24 සිට නොම්බර 26 දක්වා ට්‍රැපැස්ටි ඉදිකටු

අවශ්‍ය වර්ණවල කපු කැරලි නූල්

රාමුව

ඉදිකටු

කතුර

මෙම නිර්මාණය අඟල් 5.8 x 7.2 ප්‍රමාණයේ නිර්මාණයකි. එහෙත් ඔබට කැමැති ප්‍රමාණයට සකසා ගත හැකියි. ඔබ අඟලට කොටු 14ක් ඇති අයිඩා රෙද්ද භාවිත කරන්නේ නම් හෝ අඟලට කොටු දහයක් හෝ 11ක් ඇති රෙදි භාවිත කරන්නේ නම් නිර්මාණයේ ප්‍රමාණය තව විශාල වේ. ඒ නිසා රෙද්දේ ඇති අඟලට කොටු ප්‍රමාණය අනුව නිර්මාණයේ ප්‍රමාණය වෙනස් වේ. කෙසේ වෙතත් නිර්මාණය රාමුකර ගැනීමට අවශ්‍ය ලෙස ඉඩ තබා රෙදි කොටස කපාගත යුතුයි. ඒ සඳහා වටේට අඟල් 2ක් හෝ 3ක් ඉඩ තබා රෙදි කොටස කපාගන්න. නැත්නම් නිර්මාණය මැසුවාට පසු රෙදි කොටස කපා ගන්න. කොටු 10න් 10ට නූල් ඇද ගැනීමෙන් මැසීම පහසු වේ. කොටු ගණන් කර මසන්න. නැත්නම් නිර්මාණය හරි මැද සිට මැසීම අරඹන්න. රෙද්දේ අඟලට ඇති කොටු ප්‍රමාණය අනුව භාවිත කළ යුතු නූල් පොටවල් ප්‍රමාණය ද වෙනස් වේ. අඟලට කොටු 14ක් නම් නූල් පොටවල් 2ක් සෑහේ. අඟලට කොටු 11ක් නම් නූල් පොටවල් 4ක් හෝ 6ම භාවිත කරන්න.