හැඩ සිරුරක් සිහිනයක් නොවන්නට...

මැයි 2, 2022

 

ප්‍රධාන වේල් අතරතුර වෙනත් ආහාර නොගත යුතු අතර සීනි නොමැතිව කහට තේ, බෙලිමල්, රණවරා, කෝපි ආදිය බීමට පුළුවන්.

 

යුවතියක් සිහින්ව ඇඟ හැඩකරගෙන ඉන්නවා නම් බොහෝ දෙනකුගේ නෙත් ඒ දෙසට යොමු වන්නේ නිතැතින්. 'කොහොමද ඔයා ඇඟ අඩුකර ගත්තේ.. අනේ මටත් කියන්නකෝ..' මෙවැනි ඉල්ලීම් එමටයි. ඒ තරමට ම වර්තමානයේ බොහෝ දෙනකුට සිරුරේ වැඩි වන බර ගැටලුවක් වෙලා. බර වැඩිවන විට විවිධාකාර ලෙඩ රෝගත් සිරුර ආක්‍රමණය කරන්නේ ක්‍රම ක්‍රමයෙන්.

 

ඒත් අපට ඉතාමත් පහසුවෙන් බෝනොවන ලෙඩරෝගවලින් මිදෙන ගමන් සිරුරේ බර අඩුකර ඇඟ හැඩකර ගන්නත් පුළුවන්. මේ සඳහා අවශ්‍ය වෙන්නේ ඔබේ ආහාර රටාව මෙන්ම ජීවන රටාව ද මඳක් වෙනස් කරගැනීම පමණයි.

ආහාර රටාව වෙනස්කර ගැනීමේ දී මූලිකවම කෑමට ගැනීමෙන් වැළකිය යුතු ආහාර වර්ග ද ඇති අතර අනිවාර්යයෙන් ආහාරයට ගත යුතු ආහාර වර්ග ද තිබෙනවා.

අප ආහාරයට නොගත යුතු ආහාර වර්ග වන්නේ පාන් ඇතුළු පාන් පිටිවලින් සකසන ආහාර වර්ග, ක්ෂණික ආහාර, පැණි බීම, පැණිරස ආහාර වර්ග, මාගරින් වර්ග, එළවළු තෙල්, පාම් තෙල්, සූරියකාන්ත තෙල් වැනි තෙල් වර්ග, කෘත්‍රිම රසකාරක හා විශේෂයෙන් ම පිටිකිරි ආදිය යි.

මේවා සිරුරට අහිතකර ආහාර වර්ග වන අතර දීර්ඝ කාලීන භාවිතයෙන් ඔබ තරබාරු කරනවා පමණක් නොව, හෘදයාබාධ, අධි රුධිර පීඩනය, දියවැඩියාව, අක්මාවේ තෙල් තැන්පත් වීම, හෝමෝන අසමතුලිතතා, ගෑස්ට්‍රයිටීස්, සිරුරේ බර වැඩි වීම නිසා ඇතිවන සන්ධි අමාරු වැනි රෝගාබාධ රාශියකට උරුමකරුවකු වේ. එමනිසා මේ ආහාර භාවිතය නවතා දමා සිරුරට හිතකර ආහාර ගැනීමට උනන්දු විය යුතුය.

සිරුරට හිතකර ආහාර වර්ග ලෙස බටර්, මුදවපු මීකිරි, එළඟි තෙල්, පිරිසුදු පොල් තෙල්, සකස් නොකළ චීස්, පොල්, පොල් සම්බෝල, බිත්තර, මස්, මාළු, කරවල, රටකජු, අලිගැටපේර ආදිය දැක්විය හැකියි.

අප ආහාර ගැනීමේ දී ආහාර වේල සකසා ගතයුතු වන්නේ පිෂ්ටය 1/5ක්, එළවළු වර්ග 1/5ක් හා මේද හා ප්‍රෝටීන 3/5ක් වන ආකාරයටයි. පිෂ්ටය කොටස සඳහා බත්, කොස්, අලවර්ග, ඇට වර්ග, දෙල්, වට්ටක්කා වැනි ආහාර ගැනීමට පුළුවන්. නමුත් කිසිම විටෙක මේ පිෂ්ටය කොටස සඳහා පාන් පිටි අනුමත කළ නොහැකියි.

එළවළු 1/5 සඳහා කරවිල, පතෝල, පිපිඤ්ඤා, බණ්ඩක්කා, බෝංචි, දඹල, පලා වර්ග, කෙසෙල් මුව ආදී එළවළු වර්ග එකතුකර ගැනීමට පුළුවන්. නමුත් මතක තබා ගත යුත්තේ අර්තාපල් අල, බීට්, කැරට්, වට්ටක්කා ආදිය ගැනෙන්නේ පිෂ්ටය කොටසට බවයි.

මේදය ලබා ගැනීම සඳහා ඔබට මුදවපු මීකිරි, රටකජු, කජු, පොල්තෙල්, එළඟිතෙල්, බටර්, චීස්, අලිගැටපේර, පොල්, පොල් සම්බෝල ආදිය එකතුකර ගත හැකියි.

ප්‍රෝටීන ලබා ගැනීම සඳහා මස් වර්ග, මාළු, බිත්තර, හතු, ටෝෆු, කරවල, හාල්මැස්සෝ වැනි ආහාර ලබා ගත හැකියි.

මේ ආහාර රටාවේදී පළතුරු වර්ග ලෙස පැඟිරි කුලයේ දෙහි, දොඩම් ආදී පළතුරු මෙන්ම වෙරළු, පේර, නමිනං වැනි දේශීය පළතුරු වර්ග ගැනීම සුදුසුයි. කෙසෙල් වැනි පලතුරු නිතර ආහාරයට ගැනීම සුදුසු නොවුණත් ඉඳහිට ආහාරයට ගත හැකියි.

මේ ආකාරයෙන් ආහාර ගන්නා ඔබ ලබා ගත යුත්තේ දවසේ ප්‍රධාන ආහාරවේල් පමණි. එය හොඳින් කුස පිරෙනතෙක් ගැනීමට පුළුවන්. වැදගත් වන්නේ අනුපාතයට අනුව ආහාර වේල සකසා ගැනීමයි.

ප්‍රධාන වේල් අතරතුර වෙනත් ආහාර නොගත යුතු අතර සීනි නොමැතිව කහට තේ, බෙලිමල්, රණවරා, කෝපි ආදිය බීමට පුළුවන්. නමුත් මේ කිසිවකට සීනි හෝ හකුරු වැනි පැණිරස එකතු නොකළ යුතුය. එසේත් නැතිනම් ඔබ පානය කළ යුත්තේ ජලය පමණි. රාත්‍රී ආහාරය බිං කළුවර වැටීමට පෙර සවස 6ට පමණ ලබා ගන්න. අවම වශයෙන් රාත්‍රී 7-7.30 වන විටවත් ආහාර ගෙන අවසන් කළ යුතුය. රාත්‍රී ආහාරයෙන් පසුව වෙනත් කිසිදු ආහාරයක් නොගත යුතු අතර වතුර පානය කරන්න.

රාත්‍රී 10 ට පෙර නින්දට යන්න. නින්ද අපේ සිරුරට ඉතාමත් අවශ්‍ය අංගයකි. පසුගිය සතිවල දී නින්ද කොතරම් අපට වැදගත් ද යන්න අපි ඔබට පැහැදිලි කළෙමු.

උදේ පහෙන් පසුව අවදි වන්න. උදෑසන ආහාරය හැකි පමණ ප්‍රමාද කරන්න. හැකි තරම් වතුර බොන්න. සතියකට දින දෙකක් විනාඩි 20-30ක් ව්‍යායාම කරන්න. දිනකට විනාඩි 10ක් වත් භාවනාවක් කරන්න. එය මනසේ නිරෝගී බවට රුකුලකි. මෙසේ කිරීමෙන් ඔබට සිරුර සිහින්කරගෙන ලෙඩ රෝග අඩුකර ගත හැකියි.

 

 

ලෙඩ අඩු කර

හැඩ වැඩි කරන හැටි කියාදෙන වෛද්‍ය

ජානක වන්නකු

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.