අපේ ජීවිතයට නිරතුරුවම අවශ්‍ය වෙන විවිධ උපකරණ අමුද්‍රව්‍ය රාශියක් තිබෙනවා. මෙලෙස දෛනිකව අවශ්‍ය වෙන බොහෝ දේවල් පිටරටවලින් ගෙන්වීම ගැන පසුගිය කාලය පුරාම කතා කරනවා අපට අසන්න ලැබුණා. ගිනිපෙට්ටිය, හඳුන්කූරු, ඇල්පෙනෙත්ත පවා අපට පිටරටින් ගෙන්වීමට සිදුවීම ගැන විවිධ විවේචන රාශියක් තිබුණා. මේ විවේචන නිසාම අපට අවශ්‍ය විවිධ ද්‍රව්‍ය නිපදවා ගැනීමේ උනන්දුවකුත් පසුගිය කාලය පුරාම ඇතිවුණා.

මෙලෙසින් අපට දෛනිකව ප්‍රයෝජනවත් වෙන දෙයක් තමයි ඉටිපන්දම් නිෂ්පාදනය. අපගේ ජීවිතයේ විවිධ අවශ්‍යතාවලදී ප්‍රයෝජනවත් වන විවිධ කාලවලදී වැඩි ඉල්ලුමක් ඇති ඉටිපන්දම් අපට දේශීයව සරලව නිෂ්පාදනය කරන්න පුළුවන්. ගෘහස්ථ කර්මාන්තයක් ලෙස ගෘහණියකට අමතර ආදායමක් ලබාගැනීමේ හැකියාව ඇති ඉටිපන්දම් නිෂ්පාදනය ගැන මේ කාලයේ බොහෝ දෙනෙක් උනන්දු වෙන්නේ ඒ ගැන ඇති ඉල්ලුම ඉහළ නිසයි. විශේෂයෙන්ම වෙසක් කාලයේදී ඉටිපන්දම් සඳහා වැඩි ඉල්ලුමක් පවතිනවා වගේම තවත් බොහෝ උත්සව අවස්ථා සඳහා ඉටිපන්දම් ප්‍රයෝජනවත්. ඒ වගේම තමයි උපන්දින සාදයකට, අපේ ආදරණීය හිතමිතුරන්ට තෑග්ගක් වශයෙන් තිළිණ කරන්නටත් දැන් විසිතුරු ඉටිපන්දම් වර්ග නිෂ්පාදනය කරනවා. ඒ වගේම තමයි විවිධ සුවඳ වර්ග කැවූ ඉටිපන්දම් නිෂ්පාදනයත් දැන් ජනප්‍රියයි.

හැබැයි මේ තරම් ඉල්ලුමක් ඇති ඉටිපන්දම් නිෂ්පාදනය සඳහා යොමුවෙන පිරිස හරිම අඩුයි. එයට හේතුව මේ ගැන හරි අවබෝධයක් නොතිබීම. ඒ වගේම ඒ සඳහා ප්‍රවේශවෙන ආකාරය ගැන නිසි අවබෝධයක් නොවීම. හැබැයි ඉටිපන්දම් නිෂ්පාදනය සඳහා වැය වෙන්නේ ඉතාම අඩු ප්‍රාග්ධනයක්. ඒ වගේම මේ සඳහා විශාල තාක්ෂණික දැනුමක් අවශ්‍ය වෙන්නෙත් නැහැ. මේ සඳහා වැඩියෙන්ම අවශ්‍ය වෙන්නේ ඔබගේ උනන්දුව හා කැපවීමයි. ඒ වගේම මේ ව්‍යාපාරය දියුණු කර ගැනීම සඳහා අවශ්‍ය උපකරණත් අපේ රටේ තිබෙනවා.

මේ සඳහා මූලිකවම ඔබට අවශ්‍ය අමුද්‍රව්‍ය කිහිපයක් තිබෙනවා. මේ අමුද්‍රව්‍ය වෙළෙඳපොළේ තොග වශයෙන් මිලදී ගත හැකි අතර, අඩු මුදලට අලෙවි කරන වෙළෙඳසැල් කිහිපයක්ම පිටකොටුවේ රසායනික අමුද්‍රව්‍ය අලෙවි කරන ස්ථානවලින් මිලදී ගැනීමට හැකියාව ඇත. මේ සඳහා මූලිකවම අවශ්‍ය වෙන ද්‍රව්‍ය වන්නේ Paraffin Wax නැතිනම් ඉටිය. ඒ වගේම කපු නූල් අවශ්‍යයි. මෙලෙසින් ඉතාම අඩු අමුද්‍රව්‍ය ප්‍රමාණයකින් ආරම්භ කළ හැකි මේ ඉටිපන්දම් නිෂ්පාදන ක්‍රියාවලිය සඳහා ඔබට තවත් අවශ්‍ය වන්නේ ඉටි උණුකර ගැනීම සඳහා උපකරණ හා අච්චු කිහිපයකි. ඔබ නිෂ්පාදනය කරන ඉටිපන්දම් වර්ගය හා ඉටිපන්දමේ ප්‍රමාණය අනුව ඔබට ඒ සඳහා අච්චු නැතිනම් මොල්ඩ් මිලදී ගැනීමට සිදුවන අතර, එලෙස මිලදී ගත් ඉටිපන්දම් අච්චුවලට දියකර ගත් ඉටිපන්දම් කිරි වත්කර නූල රැඳවීමේ ක්‍රියාවලිය පිළිබඳ අවබෝධයක් හා දැනුමක් ඔබට ඇතිනම් ඉතාම සාර්ථක ලෙස ඉටිපන්දම් නිෂ්පාදනය ඔබටත් කිරීමට හැකියාව තිබේ.

සමහර විට විවිධ වූ උත්සව හා විශේෂ අවස්ථා සඳහා නිෂ්පාදනය කරන ඉටිපන්දම් සඳහා සුවඳ කැවීම හා වර්ණ යෙදීම සිදු කරයි. එවැනි ඉටිපන්දම් නිෂ්පාදය සඳහා ඔබට මේ මූලික අමුද්‍රව්‍ය කිහිපයට අමතරව විවිධ වර්ණක හා සුවඳකාරක ද මිලදී ගැනීමට සිදුවනු ඇත. එසේම මෙලෙස ඔබ නිෂ්පාදනය කරන ඉටිපන්දම් ඔබගේ නිර්මාණාත්මක හැකියාව අනුව එය අලංකාර කිරීම හා විවිධ හැඩතල යෙදීම මඟින් එයින් ඔබට ඉහළ වටිනාකමක් ඇති ඉටිපන්දම් නිෂ්පාදනය කර ගැනීමේ හැකියාව පවතී.

ඉටිපන්දම් නිෂ්පාදනයේ විශේෂ වූ වාසියක් පවතී. එනම් ඉටිපන්දම් නිෂ්පාදන ක්‍රියාවලියේදී ඉවතලන අමුද්‍රව්‍ය ප්‍රමාණය අවමය. ඔබ ඉටිපන්දම් නිෂ්පාදනයට යොදා ගන්නා ඉතිරිවන වැක්ස් නැවත වරක් ඉටිපන්දම් නිෂ්පාදනයට යොදා ගැනීමට හැකිවීම විශේෂ වාසියකි. එසේම එලෙස නැවත ප්‍රයෝජනයට ගැනීමේදී ඉටිපන්දම් වැක්ස්වල ගුණාත්මකභාවය අඩු නොවන අතර, කිසිම රසායනික වෙනස්වීමක් ද සිදු නොවනු ඇත.

මෙලෙසින් ඉටිපන්දම් නිෂ්පාදනයේදී අපට තවත් වාසි කිහිපයක් ද පවතී. එනම් ඉටිපන්දම් නිෂ්පාදනය කිරීමේදී ඒ සඳහා වැයවන ප්‍රාග්ධනය අවම මට්ටමක පැවතීම මෙන්ම මෙලෙස නිෂ්පාදනය කරන ඉටිපන්දම් අලෙවිය සඳහා දිගු කාලයක් තබාගැනීමේ හැකියාව පවතී. බොහෝ විට ස්වයං රැකියාවක් ලෙස ආහාර ද්‍රව්‍යයක් නිෂ්පාදනය කළ පසු එය අලෙවි කළ හැකි කාලයක් පවතී. එම කාලය තුළ ඔබට එම නිෂ්පාදනය විකුණා ගැනීමට නොහැකි වුවහොත් එහි පාඩුව බාර ගැනීමට සිදුවනු ඇත. නමුත් ඉටිපන්දම් නිෂ්පාදනයේ එවැනි අවදානමක් නොවන අතර, දීර්ඝ කාලයක් අලෙවිය සඳහා තැබීමේ හැකියාව පවතී. ඉටිපන්දම් වැඩි කාලයක් තබා ගැනීම සඳහා වැදගත්ම සාධකය වන්නේ ඒවා ඇසුරුම් කරන ආකාරයයි. ඔබ ඉටිපන්දම් නිෂ්පාදනය කළ පසු එය හොඳින් ඇසුරුම්කරණය කළහොත් එය වැඩි කාලයක් තබාගැනීමට හැකියාව ඇති අතර, කිසිම රසායනික වෙනස්වීමකට ලක් නොවේ.

මෙවැනි සරල වූ අවදානම අඩු වූ ඉටිපන්දම් නිෂ්පාදනය ගෘහණියකට ඉතාම පහසුවෙන් ආරම්භ කළ හැකි ව්‍යාපාරයකි. ඔබත් රැකියාවක් නොමැතිව තමුන්ගේම ව්‍යාපාරයක් ආරම්භ කිරීමට අපේක්ෂාවෙන් සිටිනවා නම් ඉටිපන්දම් නිෂ්පාදනය එයට කදිම ප්‍රවේශයකි. ව්‍යාපාරයක් ලෙස පාඩු ලැබීමේ අවධානම ඉතා අඩු නිවෙසේ සිටම අතට අමතර මුදලක් සොයාගත හැකි ඉටිපන්දම් නිෂ්පාදනය රැකියාවක් ලැබෙනතුරු අතට මුදලක් සොයාගත හැකි අවම පිරිවැයකින් ඉතාම පහසුවෙන් ආරම්භ කළ හැකි ව්‍යාපාරයකි.මේ ගැන තොරතුරු හා විස්තර හා අමුද්‍රව්‍ය මිලදීගත හැකි ස්ථාන පිළිබඳ තොරතුරු අවශ්‍ය නම් ඒ පිළිබඳ ඔබට මඟපෙන්වීමට අප නිරතුරුවම සූදානම්.